Lennoù Meur Amerika, pe Lennoù Meur Norzhamerika pe al Lennoù Meur hepmuiken (Great Lakes e saozneg, Grands Lacs e galleg), zo un hollad lennoù en em astenn war an harzoù etre Kanada ha Stadoù Unanet Amerika. Mont a reont d'ober ar brasañ hollad ledennadoù dour dous zo er bed. En holl en em astennont war ur gorread a 243.459 km2, ha tremen 500 000 km2 eo gorread o diazad doureier. Emaint etre proviñsoù Ontario ha Kebek e Kanada, ha stadoù Illinois, Indiana, Michigan, Minnesota, New York, Ohio, Pennsylvania, ha Wisconsin, er Stadoù Unanet. Ouzhpenn 33 milion a dud zo o chom war o ribloù.